Torbjørn Maaø sæjhta orre kultuvre-nuepie Laavlomegåetesne öörnedh. Skïereden bearjadahken 13.biejjien dellie Maaø aktem konseertem Thomas Brøndboine Laavlomegåetesne öörnie. Maaø hååhkesje Laavlomegåetie almetjistie dïeves juktie dïhte maahta vielie konseertide öörnedh.
Torbjørn Maaø edtja aktem konseertem Laavlomegåetesne öörnedh.
Torbjørn aaj aarebi konserth Laavlomegåetesne vuartasjamme.
-Lij joekoen tryjjes, öövre tjaebpies gåetie onne jïh stoerre konseerti åvteste. Tuhtjem onnetje håjnoes ahte ij edtjh vielie konseerth desnie årrodh. Mahte naanh pop-konseerth jallh naanh åehpies musihke. Lea gaajh faavroes kultuvre Röörosisnie jïh jïjnjh deahpadieh. Ij leah naanh jïjnjh pop jïh dannasinie meehtim dam raejkiem skuvmiestidh, Torbjørn jeahta.
Jis gellieh almetjh Brøndbo-konseertese båetieh kaanne aaj vielie konseerth Laavlomegåetesne sjidtieh.
-Jïh numhtegh leam ussjedamme. Daate maahta aktem aarkebiejjien-prosjeekte munnjien årrodh, juktie manne musihkem ålvas lyjhkem. Sjïere dagkeres jieleme-musihke. Jis buektehtem Laavlomegåetie almetjistie dïeves aaj sïjhtem jeatjah aartisth diekie veedtjedh, Torbjørn jeahta. Torbjørn aaj jeahta daelie maehtede leahpah Brøndbo-konseertese åestedh.
