Politihkeles krirrieh jïh læstoeh jïjtjemse ryöjredieh daan tjaktjen tjïelte- jïh fylhkendigkieveeljemasse. Gosse daejrebe ahkedh jienebh voeresh siebriedahkesne sjædta, dellie tjoeperdihks joekoen vaenie båarasåbpoe tjirkijh leah nammoehtamme jearsoes sijjine veeljemelæstojne, Saemiedigkien voereseraerie veanhta.
Nöörjen årroejijstie joe bijjelen 1. millijovnh årrojh bijjelen 60 jaepieh. Dan åvteste vihkeles båarasåbpoe almetjh nuepiem åadtjoeh meatan årrodh dennie politihkeles stuvremesysteemesne. Jïh joekoen gosse tjïelth jïh fylhkh tjåanghkan bïejesuvvieh jïh sagke stuerebe sjidtieh goh daelie, jïh politihkeles nænnoestimmieh enn guhkede mijjeste dorjesuvvieh goh aarebi. Daan biejjien fer vaenie båarasåbpoe almetjh meatan dejnie almetjeveeljeme årgaanine.
Saemiedigkien voereseraeresne veanhta båarasåbpoe almetjh byöroeh vyljehke årrodh veeljemelæstojne tjåadtjodh jearsoes sijjine guktie dej lea nuepie veeljesovvedh tjïelteståvroej jïh/jallh fylhkendigkiej sïjse. Gosse læstojne tjåadtjoeh, dej aaj leah jienebh nuepieh veeljesovvedh tjïelti jïh fylhki vueliemoenehtsi sïjse.
Saemiedigkien voereseraerien mietie lea aaj vihkeles politihkeles krirrieh jïh læstoeh veeljemeprogrammh utnieh mah voeresepolitihkem jarngesne utnieh. Gosse båarasåbpoe almetjh leah meatan politihkeles barkosne voengesne, dah sijhtieh maehtedh meatan årrodh sijjen jieledetsiehkieh evtiedidh tjïeltine jïh fylhkine.
Saemiedigkien voereseraerie haasta politihkeles krirrieh jïh læstoeh båarasåbpoe almetjh meatan vaeltedh dan politihkeles stuvremesysteemen sïjse jïh voeresepolitihkem hammoedidh fïereguhten veeljemprogrammine.
