Saemien maanah jïh noerh edtjieh åadtjodh haestiedihks teemaj bïjre lïeredh jïjtsh gïelesne

Mikkel Eskil Mikkelsen. Foto: Kenneth Hætta.

Saemiedigkie 10 millijovnh kråvnah prioriterede digitaale learoevierhtide juktie trïegkenassem, båajhtoeh åtnoem geeruvevoeteste, vædtsoesvoetem jïh daaresjimmiem heerredidh.

Taalh Learohkegoerehtimmeste vuesiehtieh saemien learohkh irhkemem dååjroeh sijjen skuvleaarkebiejjien. Dotkeme maam dotkije Astrid M. A. Eriksen Saemien healsoedotkemejarngesne lea dorjeme vuesehte saemien nyjsenæjjah Nöörjesne leah vielie vædtsoesvoetem jïh daaresjimmiem dååjreme goh nöörjen nyjsenæjjah. Vaenie learoevierhtieh daej teemaj bïjre gååvnesieh.

Vihkeles daajrojne

– Daate akte itjmies tsiehkie maam ibie maehtieh jååhkesjidh, tjoerebe learoevierhtieh reebledh mejtie skuvlh maehtieh nuhtjedh  jïh mah maehtieh trïegkenassem, båajhtoeh åtnoem geeruvevoeteste, vædtsoesvoetem jïh seksuelle daaresjimmiem heerredidh, saemiedigkieraerie Mikkel Eskil Mikkelsen jeahta.

Saemien maanah jïh noerh daarpesjieh lïerehtimmiem åadtjodh jïh daej teemaj jïh haestemi bïjre ussjedadtedh jïjtsh gïelesne.

– Tjoerebe doestedh vuesiehtidh, soptsestidh jïh digkiedidh daej aamhtesi bïjre, Mikkelsen jeahta. Munnjien vihkeles saemien lohkehtæjjah hijven learoevierhtieh åadtjoeh mejtie maehtieh lïerehtimmesne nuhtjedh, Mikkelsen jeahta.

Gaahtjemem bæjhkoehtamme

Daelie Saemiedigkie aktem gaahtjemem bæjhkoehtamme dejnie aajkojne mierielatjkoem darjodh learoevierhtieprodusentigujmie, mah maehtieh dåaresthfaageles digitaale learoevierhtieh darjodh noerhte-, julev- jïh åarjelsaemien gïelesne maadthskuvlese jïh jåarhkelïerehtæmman daej teemaj sisnjeli:

  • Kråahpe, seksualiteete jïh raastebïejeme
  • Heerredimmie geeruvevoeteste, vædtsoesvoeteste jïh daaresjimmeste
  • Heerredimmie trïegkenasseste, narrahtimmeste jïh sïerredimmeste

Gaahtjeme lea bæjhkoehtamme nedtesijjesne Doffin.no. Deellememierie faalenasseste lea ruffien 7. b. 2019. Saemiedigkie gegkeste gellie hijven faalenassh åadtjodh.

– Bïevnesh, daajroe jïh goerkese mijjese håhkoem vedtieh buektiehtidh evtiedimmiem siebriedahkeste jarkelidh akten buerebe otnjegen vööste, saemiedigkieraerie Mikkel Eskil Mikkelsen jeahta.